Stúdentaráð fundaði í gær í 7. skipti á þessu starfsári, en ráðið fundar mánaðarlega og eru fundir ráðsins opnir öllum stúdentum við Háskóla Íslands. Forseti Stúdentaráðs stýrir fundum ráðsins og byrjar hvern fund á að fara yfir tilkynningar og helstu mál á döfinni, en það er mikilvægur liður í að tryggja upplýsingaflæði frá skrifstofu Stúdentaráðs til stúdenta.
Á fundinum kynnti Sigríður Olafsson, Alþjóðafulltrúi LÍS Student Refugees Iceland (SRI) sem hún stýrir ásamt Ernu Benediktsdóttur. Sigríður situr einnig í Stúdentaráði og sinnir því sjálfboðastörfum í þágu stúdenta á ýmsum vettvöngum. SRI er er verkefni sem snýr að því að aðstoða flóttafólk og hælisleitendur við að sækja um nám hérlendis. Hún fór yfir söguna að baki verkefninu, hvernig starfsemin fer fram og hvernig er hægt að taka þátt, en þau eru að leita að fleiri sjálfboðaliðum til þess að taka þátt. Það var fróðlegt að heyra nánar um þetta mikilvæga verkefni og hvetjum við öll sem hafa áhuga og tök á að að skrá sig sem sjálfboðaliða – sjá nánar hér.
Fjórar tillögur voru lagðar fyrir ráðið og hlutu þær allar einróma samþykki. Var það tillaga um herferð Stúdentaráðs, tillaga um að Stúdentaráð beiti sér fyrir aukinni hinseginfræðslu á Heilbrigðisvísindasviði, tillaga um að Stúdentaráð leggi til breytingar á úthlutunarreglum Félagsstofnunar Stúdenta og tillaga um að Stúdentaráð skrifi undir opið bréf til Sundhallar Reykjavíkur og ÍTR þess efnis að einum inniklefa Sundhallarinnar verði breytt í fjölskylduklefa. Þessar tillögur verða núna unnar áfram af réttindaskrifstofu Stúdentaráðs, sviðsráðum og fastanefndum SHÍ eftir því sem við á.
Þá voru teknar fyrir lagabreytingar á lögum Stúdentaráðs, uppfærð lög Stúdentaráðs má finna hér. og framkvæmdastjóri stöðuna á fjárhagsáætlun Stúdentaráðs skv. verklagi. Andri Már Tómasson, stúdentaráðsliði, sagði síðan frá því hver árangurinn af tillögu hans frá nóvemberfundi Stúdentaráðs hefði verið, en hún sneri að því að Stúdentaráð beitti sér fyrir því að fleiri stúdentar myndu skrá persónufornöfn sín á Canvas. Herferðin skilaði góðum árangri en þó eru enn margir stúdentar sem eiga eftir að birta fornöfn sín og lagði Andri til áframhaldandi vinnu í þessum málum.
Að lokum kaus ráðið hver yrði tilnefning Stúdentaráðs í kjöri til Ungmennafulltrúa Íslands hjá Sameinuðu þjóðunum á sviði mennta, vísinda og menninga, en auglýst var eftir umsóknum meðal allra stúdenta í HÍ. Fjórar umsóknir bárust og hlaut Isabel Alejandra Díaz, nemi í opinberri stjórnsýslu flest atkvæði.
Stúdentaráð er stolt af því að tilnefna hana en Isabel hefur mikla reynslu af störfum í þágu ungs fólks, en hún starfaði sem forseti SHÍ frá 2020 – 2022 og sat samhliða því fyrir hönd stúdenta í háskólaráði. Í kynningarbréfi sínu kom Isabel inn á það hvernig reynsla hennar innan SHÍ og HÍ myndi reynast henni í hlutverki sem þessu:
,,Störf mín undanfarin misseri hafa kveikt áhuga minn á menntakerfinu sem slíku og starfsemi hins opinbera. Sérstaklega í ljósi uppstokkunar á mennta- og menningarmálum og stofnun nýs ráðuneytis háskóla sem samtvinnar einkum vísindi og nýsköpunarmál. Aðkoma að stefnumótunarferli HÍ26 á vettvangi háskólaráðs og rektorsskrifstofu jók einnig vitneskju mína í þessum efnum sem og samþættingu þeirra við heimsmarkmið Sameinuðu þjóðanna.”
,,Ég hef því öðlast viðamikla þekkingu á umsagnar- og greinarskrifum, tillögugerð og málefnastarfi ásamt því að þróa góða framkomu og samskiptalipurð við þar til bær stjórnvöld, ólíka hagaðila og í viðtölum við fjölmiðla. Ég hef mikla ástríðu fyrir þeim málaflokkum sem hér ræðir um en ég tel þá vera meginstólpa íslensks samfélags. Ljóst er að þessi staða ungmennafulltrúa geti verið liður í því að m.a. miðla starfsemi UNESCO til ungs fólks og vera rödd þess gagnvart stjórnvöldum þegar kemur að mennta, vísinda og menningarmálum.”
Isabel Alejandra Díaz
Kjörið sjálft fer svo fram á leiðtogaráðsfundi Landssamtaka ungmennafélaga (LUF) þann 24. janúar nk. þar sem kosið er á milli tilnefninga frá aðildarfélögum LUF og óskum við Isabel góðs gengis.
Eins og sjá má er af nógu að taka á fundum Stúdentaráðs og eru fundir ráðsins hátt í þrír tímar og þökkum við Joe and the Juice kærlega fyrir að styrkja okkur um samlokur og safa til að tryggja orku fundargesta. Við vekjum athygli á því að þau hafa opnað á Birkimel (við Þjóðarbókhlöðuna og Sögu) og bjóða upp á 50% afslátt af djúsum, sjeikum og kaffi út janúar.
Fimmtudaginn 19. janúar fer Stúdentaráðsfundur fram kl 17:00 í stofu HT-101.
Samkvæmt 9. gr. laga Stúdentaráðs eru fundir ráðsins opnir öllum stúdentum við Háskóla Íslands. Þá skal auglýsa meðal stúdenta og er áhugasömum velkomið að mæta á fundi ráðsins.
Vinsamlegast hafið samband við skrifstofu Stúdentaráðs, í síma 570-0850 eða í tölvupósti, shi@hi.is, ef spurningar vakna um fundinn eða dagskrá hans. Jafnframt er öllum stúdentum velkomið að hafa samband við skrifstofu Stúdentaráðs vakni spurningar um réttindi þeirra.
Fundur settur 17:00
Fundargerð síðasta fundar borin upp til samþykktar (atkvæðagreiðsla) 17:00-17:05
Tilkynningar og mál á döfinni 17:05-17:20
Student Refugees Iceland (kynning og umræður) 17:20-17:35
Fjárhagsáætlun Stúdentaráðs 2022-2023 (kynning og umræður) 17:35-17:50
Tillaga um herferð Stúdentaráðs 17:50-18:00 (atkvæðagreiðsla)
Hlé 18:00-18:10
Lagabreytingartillögur á lögum Stúdentaráðs 18:10-18:50 (atkvæðagreiðsla)
Tillaga um aukna hinseginfræðslu á Heilbrigðisvísindasviði 18:50-19:00 (atkvæðagreiðsla)
Tillaga um breytingar á úthlutunarreglum FS 19:00-19:10 (atkvæðagreiðsla)
Tilnefning Stúdentaráðs í kjöri til Ungmennafulltrúa Íslands hjá Sameinuðu þjóðunum á sviði mennta, vísinda og menninga (atkvæðagreiðsla) 19:10-19:20
Langar þig að vera fyrsti ungmennafulltrúi Íslands hjá Sameinuðu þjóðunum á sviði mennta, vísinda og menningar? Lestu þá lengra!
Landssamband ungmennafélaga (LUF), í samstarfi við Félag Sameinuðu þjóðanna á Íslandi og menningar- og viðskiptaráðuneytið hefur óskað eftir framboðum til ungmennafulltrúa Íslands hjá Sameinuðu þjóðunum á sviði mennta, vísinda og menningar. Stúdentaráð Háskóla Íslands er aðildarfélag að LUF og getur sem slíkt boðið fram einn fulltrúa í umboði Stúdentaráðs. Leiðtogaráð LUF kýs svo á milli tilnefninga aðildarfélaganna á fundi ráðsins þann 24. janúar nk.
Ef þú ert nemandi við Háskóla Íslands getur þú sótt um að vera tilnefning SHÍ ef þú uppfyllir eftirfarandi skilyrði:
Ert á aldrinum 18-27 ára
Hefur þekkingu á Heimsmarkmiðum Sameinuðu þjóðanna
Hefur reynslu af hagsmunastarfi ungmennafélaga
Býrð yfir leiðtogahæfni og frumkvæði
Hefur vald á íslensku og ensku í ræðu og riti
Viðeigandi menntun sem nýtist í embætti / þekking á Sameinuðu þjóðunum er kostur.
Ef þetta á við um þig og þú vilt sækja um að vera tilnefning SHÍ, sendu okkur þá kynningarbréf þar sem fram kemur hvers vegna þú sækir um stöðuna og hvernig þú telur þig uppfylla skilyrðin hér að ofan á shi@hi.is. Ef umsækjandi verður ekki talinn uppfylla skilyrði umsóknar verður henni vísað frá. Frestur er til og með 17. janúar.
Ungmennafulltrúi Íslands á sviði mennta, vísinda og menningar er skipaður til tveggja ára og mun þurfa að sækja aðalráðstefnu UNESCO ásamt norrænum samstarfsfundum. Sömuleiðis situr ungmennafulltrúinn í Íslensku UNESCO nefndinni, sem fundar 4-6 sinnum á ári og er nefndarseta launuð. Þurfa frambjóðendur að geta skuldbundið sig til tveggja ára auk þess að sækja alla viðburði sem af þeim er krafist. Embættið er sjálfboðastarf, að dagpeningum erlendis og nefndarsetu í Íslensku UNESCO nefndinni undanskildum.
Umsóknarfrestur fyrir námslán fyrir vorönn 2023 er til og með 15. janúar. Nánari upplýsingar má finna á vef Stúdentaráðs: https://student.is/saekja-um-lan. Sjá einnig heimasíðu Menntasjóðs námsmanna: https://menntasjodur.is/namsmenn/namslan/.
Lánasjóðsfulltrúi SHÍ, María Sól Antonsdóttir, tekur við spurningum um umsóknarferlið og námslán almennt.
Stúdentaráð Háskóla Íslands lýsir yfir þungum áhyggjum af fjármögnun Háskóla Íslands í ljósi umræðna um fjárlög á þingi og gagnrýnir harðlega beiðni háskólayfirvalda um hækkun skrásetningargjaldsins.
Rektor Háskóla Ísland, hefur farið þess á leit við ráðherra ásamt rektorum hinna opinberu háskólanna að heimildin um hámarksupphæð skrásetningargjaldsins í lögum verði hækkuð upp í 95.000kr. Það gerði hann áður en málið var tekið upp í háskólaráði og má sjá afstöðu fulltrúa stúdenta í háskólaráði til þessara vinnubragða og gagnvart umræðum um hækkun í fundargerð háskólaráðs hér.
Úr bókun fulltrúa stúdenta: ,,Við hljótum öll að vera sammála um það að Háskóli Íslands er vanfjármagnaður en það er sorgleg staða að óskað sé eftir því að stúdentar beri uppi rekstur opinberrar háskólamenntunar með þessum hætti.”
Stúdentaráð leggst alfarið gegn öllum áformum um hækkun gjaldsins. Ráðast þurfi tafarlaust á rót vandans, sem er fjármögnun opinberrar háskólamenntunar hér á landi, eða réttara sagt skortur á henni. Stúdentaráð krefst þess að stjórnvöld sinni lögbundnum skyldum sínum um fjármögnun opinberrar háskólamenntunar í stað þess að velta byrðinni yfir á stúdenta.
Úr yfirlýsingunni: ,,Það er ekki tilviljun að háskólayfirvöld óski eftir hækkun á skrásetningargjaldinu í kjölfar 2. umræðu fjárlaga og þeim niðurskurði til Háskóla Íslands sem þar er boðaður. Byrðinni af fjármögnun opinberrar háskólamenntunar er velt beint yfir á stúdenta vegna þess að stjórnvöld sinna ekki lögbundinni skyldu sinni til þess að halda uppi grunnstarfsemi háskólanna með nægilegri fjárveitingu á fjárlögum. Beiðni um hækkun gjaldsins nú er ekkert annað en örvæntingarfull tilraun háskólayfirvalda til þess að plástra blæðandi sár, enda yrði hækkun gjaldsins aðeins dropi í hafið fyrir háskólann miðað við það fjármagn sem upp á vantar, en myndi aftur á móti hafa mikil áhrif á stúdenta.”
Fimmtudaginn 15. desember fer Stúdentaráðsfundur fram kl 17:00 í stofu HT-101.
Samkvæmt 9. gr. laga Stúdentaráðs eru fundir ráðsins opnir öllum stúdentum við Háskóla Íslands. Þá skal auglýsa meðal stúdenta og er áhugasömum velkomið að mæta á fundi ráðsins.
Vinsamlegast hafið samband við skrifstofu Stúdentaráðs, í síma 570-0850 eða í tölvupósti, shi@hi.is, ef spurningar vakna um fundinn eða dagskrá hans. Jafnframt er öllum stúdentum velkomið að hafa samband við skrifstofu Stúdentaráðs vakni spurningar um réttindi þeirra.
Fundur settur 17:00
Fundargerð síðasta fundar borin upp til samþykktar (atkvæðagreiðsla) 17:00-17:05
Tilkynningar og mál á döfinni 17:05-17:25
Fjárveitingar til Háskóla Íslands 17:25-17:45
Kynning á Landssamtökum íslenskra stúdenta (LÍS) 17:45-18:05
Hlé 18:05-18:15
Tillaga um að frídagar stúdenta séu tryggðir 18:15-18:25 (atkvæðagreiðsla)
Tillaga um aukna þjónustu Hámu í Eirberg, Læknagarði og Stakkahlíð 18:25-18:35(atkvæðagreiðsla)
Búið er að opna fyrir umsóknir í aðra úthlutun Stúdentasjóðs.
Umsóknareyðublað er að finna hér. Við viljum hvetja til þess að umsóknareyðublaðið sé eins vel útfyllt og kostur er, umsóknum sem uppfylla ekki skilyrði verður vísað frá. Einnig hvetjum við til þess að umsækjendur kynni sér sérstaklega lög og verklagsreglur sjóðsins áður en sótt er um.
Tekið er við umsóknum til kl.10:00 þann 19. desember 2022. Umsóknum sem berast eftir þann tíma verður sjálfkrafa vísað frá.
Spurningum skal vísað til Dagnýjar Þóru Óskarsdóttur, forseta sjóðsins, á netfangið studentasjodur@hi.is.
Hefð hefur skapast fyrir því að stúdentar haldi upp á 1.desember, fullveldisdaginn. Venju samkvæmt gengu stúdentar að leiði Jóns Sigurðssonar í Hólavallakirkjugarði í morgun og lögðu þar blómsveig ásamt Jóni Atla Benediktssyni rektor og Guðbjörgu Lindu Rafnsdóttur, aðstoðarrektor vísinda. Stúdentaráð Háskóla Íslands bauð svo stúdentum upp á heitt kakó og smákökur á Háskólatorgi. Rakel Anna Boulter, bókmenntafræðinemi og Stúdentaráðsliði flutti hugvekju til stúdenta í tilefni dagsins sem má finna hér að neðan í heild sinni.
Stúdentaráð óskar stúdentum til hamingju með daginn og góðs gengis í verkefnaskilum og prófum!
Hugvekja flutt af Rakel Önnu þann 1. desember 2022:
,,Mig langar að segja ykkur sögu, af góðum vini mínum, sem langaði, eftir menntaskóla að ferðast um heiminn, en vegna ákveðinnar veiru var það ekki hægt. Hann byrjaði því að læra Rússnesku við Háskóla Íslands haustið 2020. Flest furðuðu sig á þessu vali og spurðu hann hvernig í ósköpunum hann ætlaði að nýta þessa menntun. Á einni nóttu breyttist það. Allt í einu varð fólk með hans menntun mikilvægasta fólkið á landinu. Innrás Rússlands í Úkraínu olli því að allir fréttamiðlar vildu ná tali á einhverjum sem þekkti til tungumáls, stjórnmála, sögu og menningarheima þessa heimshluta.
Við erum ekki alltaf að einblína á stóra samhengið. Sem er eðlilegt og gott. Í háskólanámi gefst einmitt tækifæri til að sökkva sér á kaf í fræðin, einblína á einn þátt eða eitt sjónarhorn. Einmitt það gerir Háskóla að svo mögnuðum stað, fyrir þær sakir að þar mætast allir þessi hugarheimar.
Litlu dæmin sýna okkur stóra samhengið. Auðvitað getum við ekki áætlað um hvaða menntun verður veigamest eftur tíu ár, hvað þá eftir fimmtíu ár. Heimurinn breytist svo hratt að háskólasamfélagið má hafa sig allt við að halda í við hann. En eitt getum við vitað fyrir víst sem mun ekki breytast, fjárfesting í menntun skilar alltaf auði. Að gera nám aðgengilegt öllum er þannig skotheld leið að auknum gróða, bæði af fjárhagslegu og auðvitað vitsmunalegu tagi. Eins og aðrar fjárfestingar þar aðeins að leggja út fyrir því fyrst, en það fjármagn skilar sér margfalt.
Stúdentar hafa oftar en ekki verið framarlega í baráttunni fyrir breytingum í samfélaginu öllu, líkt og rifjað er upp 1. desember. Stúdentar láta sig varða allt frá jafnréttismálum yfir í samgöngumál og jafnvel siðferðileg álitamál. Talsverðar umbætur hafa átt sér stað í tímans rás en barátta stúdenta fyrir öflugra háskólasamfélagi og bættum kjörum stúdenta er enn í fullum gangi, enn er mikið rými til umbóta.
Mörg halda að hagsmunabarátta stúdenta varði aðeins þau sem eru í háskólanámi núna. Það er svo sannarlega ekki raunin. Baráttan fyrir fjölbreyttri menntun sem er aðgengileg öllum er barátta fyrir bætta framtíð.
Það er fallegt að líta til þess að þessi dagur, 1.desember, var fyrst haldinn hátíðlegur af stúdentum til heiðurs Eggerts Ólafssonar, náttúrufræðings og skálds. Ólík fög fara gjarnan vel saman. Andstæður hjálpa okkur að sjá nýjar hliðar á heiminum sem spegill hefði ef til vill ekki gert.
Baráttuandi stúdenta lifir enn góðu lífi og stúdentar munu halda áfram að berjast fyrir bættu samfélagi í dag, 1. desember, sem og alla aðra daga ársins. Til hamingju með daginn, kæru stúdentar.”
Stúdentar áttu 10 fulltrúa, ásamt tveimur fulltrúum úr háskólaráði, á Háskólaþingi sem fram fór föstudaginn 18. nóvember sl.
Á þinginu voru m.a. sjálfbærniáherslur stefnu Háskóla Íslands 2021-2026, HÍ26, til umræðu og fyrsta sjálfbærniskýrsla Háskóla Íslands kynnt. Þá var einnig rætt um skipulag, framkvæmdir og samgöngur á háskólasvæðinu og farið yfir þróunaráætlun svæðisins.
Stúdentaráð lýsir yfir ánægju með áherslumál þingsins enda eru þau stúdentum hugleikin og spila veigamikið hlutverk í framtíðarsýn Stúdentaráðs á háskólasvæðið. U-passinn hefur verið baráttumál Stúdentaráðs um árabil og því er áætlun um innleiðingu hans, sem tilkynnt var um á þinginu, mikið fagnaðarefni fyrir stúdenta sem og áætlanir um uppbyggingu hjólaskýla á háskólasvæðinu.
Stúdentaráð mun halda áfram að þrýsta á að sjálfbærni-, samgöngu- og skipulagsmálum verði gert hátt undir höfði með sjálfbærara háskólasamfélagi að markmiði.
Stúdentaráð blés til málfundar um skrásetningargjaldið í hádeginu í gær, 23. nóvember 2022.
Forseti Stúdentaráðs, Rebekka Karlsdóttir opnaði fundinn með tölu um hvers vegna Stúdentaráð boðar til fundarins og afstöðu ráðsins gagnvart gjaldinu. Þá var opnað fyrir umræður og sátu þau Jóna Þórey Pétursdóttir, lögfræðingur og fyrrverandi forseti Stúdentaráðs, Erla Guðrún Ingimundardóttir, aðallögfræðingur á rektorsskrifstofu háskólans og Friðrik Jónsson, formaður Bandalags háskólamanna fyrir svörum. Mbl.is fjallaði um fundinn, ásamt því að rætt var við forseta Stúdentaráðs í hádegisfréttunum á Bylgjunni í dag (byrjar á 09:42).
Á fundinum sköpuðust góðar umræður en þó er enn mörgu ósvarað, og mun ráðið halda samtalinu um skrásetningargjöldin almennt, lögmæti þeirra og fjármögnun háskólastigsins áfram af fullum krafti.
Ljóst er að nemendur á Íslandi standa undir miklu meira af fjármögnun háskólastigsins heldur en gildir á Norðurlöndunum og þarf að tala um hvernig háskólastigið er fjármagnað með réttum orðum og gegnsæjum hætti. Stúdentaráð telur háskólann vera með gjaldinu að rukka stúdenta meira en lög heimila og gjöldin feli þannig í sér falin skólagjöld.
Næstu skref
Stúdentaráð hefur kallað eftir því að löggjafinn bregðist við, ásamt því að óskað hefur verið ráðherra til þess að ræða lögmæti skrásetningargjaldsins og fjármögnun háskólastigsins í heild sinni. Jafnframt mun ráðið fylgjast með máli nemandans, sem komið er aftur til áfrýjunarnefndar í kærumálum háskólanema og fylgja því eftir innan háskólans.
Skrásetningargjaldið felur í sér álögur á stúdenta og dregur úr jöfnu aðgengi fólks að háskólamenntun. Stúdentaráð mun halda áfram að þrýsta á að stjórnvöld standi við gefin loforð um stórsókn í menntun og geri nauðsynlegar breytingar á fyrirkomulagi fjárveitinga til háskólastigsins, til að tryggja jafnrétti til náms og samkeppnishæfni íslenskrar háskólamenntunar.
Meðfylgjandi eru myndir sem Kristinn Magnússon tók fyrir mbl.is á fundinum:
