Stúdentaráð Háskóla Íslands auglýsir eftir umsóknum í stöður alþjóðafulltrúa, framkvæmdastjóra, kjarafulltrúa og ritstjóra fyrir starfsárið 2026-2027
Alþjóðafulltrúi:
Alþjóðafulltrúi hefur yfirumsjón með framkvæmd þjónustu skrifstofu Stúdentaráðs við erlenda nemendur og hefur það hlutverk að gæta hagsmuna þeirra, auðvelda þeim að gerast virkir þátttakendur í háskólasamfélaginu, svara fyrirspurnum og veita aðra aðstoð.
Alþjóðafulltrúi er trúnaðarfulltrúi erlendra nemenda við Háskóla Íslands og skal veita viðtöl, símaþjónustu og svara tölvupóstum eftir þörfum þeirra. Í samvinnu við skrifstofu Alþjóðasviðs hefur alþjóðafulltrúi milligöngu um að verða erlendum nemendum úti um tengilið (mentor) úr hópi nemenda Háskóla Íslands. Þá aðstoðar alþjóðafulltrúi skrifstofu Alþjóðasviðs við skipulagningu viðburða, svo sem móttöku erlendra nemenda og Alþjóðadaga Háskóla Íslands. Auk þess er alþjóðafulltrúi forseti alþjóðanefndar Stúdentaráðs og tekur þátt í daglegum störfum skrifstofu Stúdentaráðs í samráði við forseta ráðsins.
Alþjóðafulltrúi starfar einnig sem fulltrúi stúdenta innan alþjóðlega samstarfsnetsins Aurora. Hann hefur umsjón með verkefnum þar, starfar með tengiliðum Aurora innan Háskóla Íslands og aðstoðar við verkefni sem þau fela honum. Hann sér einnig um undirbúning fyrir ráðstefnur og fleiri viðburði tengdum Aurora og tekur þátt eins og við á.
Hæfniskröfur:
- Frumkvæði og geta til að starfa sjálfstætt
- Hæfni í mannlegum samskiptum
- Fullnægjandi kunnátta á íslensku og ensku er skilyrði
- Áhugi á Stúdentaráði og málefnum stúdenta auk virkrar þátttöku í háskólasamfélaginu
- Þekking og reynsla af alþjóðastarfi er kostur
- Þekking á stjórnsýslu Háskóla Íslands er kostur
- Þekking á Aurora samstarfsnetinu er kostur
- Reynsla af viðburðastjórnun er kostur
- Önnur tungumálakunnátta er kostur
- Reynsla af stefnumótun er kostur
Starfshlutfall er í kringum 50% eða eftir samkomulagi.
Kynningarbréf ásamt ferilskrá og upplýsingum um umsagnaraðila skal skila í gegnum tölvupóst á netfang Stúdentaráðs shi@hi.is merkt „Atvinnuumsókn“.
Umsóknarfrestur er til og með 1. júní 2026. Umsóknir sem berast eftir þann tíma eru ekki teknar gildar.
Framkvæmdastjóri:
Framkvæmdastjóri tekur þátt í að vinna að skilvirkum og góðum starfsháttum á skrifstofu Stúdentaráðs. Hann gætir fjármuna og eigna Stúdentaráðs, vinnur að hagkvæmni í fjárútlátum og heldur upplýsingaflæði milli skrifstofu og Stúdentaráðs.
Framkvæmdastjóri hefur yfirumsjón með fjármálum Stúdentaráðs, umsjón með rekstri skrifstofunnar, þar með talið tímaskráningum starfsfólks hennar og greiðslu launa. Hann sér um samningsgerðir á vegum Stúdentaráðs og eftirfylgni þeirra, sér um auglýsingasöfnun í útgefið efni Stúdentaráðs ásamt því að rita fundargerðir Stúdentaráðs og stjórnar Stúdentaráðs. Auk þess tekur framkvæmdastjóri þátt í daglegum störfum skrifstofunnar í samráði við forseta.
Hæfniskröfur:
- Áhugi á Stúdentaráði og málefnum stúdenta auk virkrar þátttöku í háskólasamfélaginu.
- Þekking og reynsla á fjármálum og bókhaldi.
- Vilji og geta til þess að vinna með stúdentaráðsliðum, starfsfólki skrifstofu Stúdentaráðs og öðrum hagsmunaaðilum ráðsins.
- Hæfni í mannlegum samskiptum.
- Geta til að tjá sig í ræðu og riti á íslensku og ensku er skilyrði.
- Frumkvæði og geta til að starfa sjálfstætt.
- Menntun sem nýtist í starfi er kostur.
- Þekking á bókhaldshugbúnaði er kostur.
- Þekking á stjórnsýslu Háskóla Íslands er kostur.
- Reynsla af viðburðastjórnun er kostur.
- Önnur þekking og reynsla sem nýtist í starfi.
Starfshlutfall er breytilegt eða eftir samkomulagi.
Kynningarbréf ásamt ferilskrá og meðmælum skal senda í tölvupósti á netfang ráðsins: shi@hi.is merkt „Atvinnuumsókn“.
Umsóknarfrestur er til og með 1. júní 2026. Umsóknir sem berast eftir þann tíma eru ekki teknar gildar.
Kjara- og sjálfbærnifulltrúi
Kjara- og sjálfbærnifulltrúi vinnur í nánu samstarfi við Visku við að efla vitund háskólanema um kjara- og réttindamál á vinnumarkaði og við að veita þjónustu til háskólanema er varðar kjör og réttindi þeirra á vinnumarkaði. Þá vinnur fulltrúinn að sjálfbærnimálum innan háskólans í samstarfi við Sjálfbærnisvið HÍ í því markmiði að efla vitund háskólanema um sjálfbærni og stuðla að sjálfbærari háskólasamfélagi.
Helstu verkefni eru þar á meðal að skipuleggja fræðsluviðburði tengda sjálfbærni og kjaramálum, miðla upplýsingum um sjálfbærnimál innan SHÍ og Háskóla Íslands, halda utan um yfirlit og framvindu verkefna og skýrslugerð um stöðu og þróun kjara- og sjálfbærnimála innan háskólasamfélagsins.
Hæfniskröfur:
- Frumkvæði, sjálfstæði í vinnubrögðum og góð skipulagshæfni
- Áhugi á málefnum stúdenta og kjaramálum
- Geta til að starfa sjálfstætt og í teymi
- Fullnægjandi kunnátta á íslensku og ensku er skilyrði
- Æskilegt er að viðkomandi hafi þekkingu og/eða áhuga á sjálfbærni og hagsmunagæslu stúdenta
- Þekking og reynsla af störfum Stúdentaráðs er mikill kostur
- Reynsla af viðburðastjórnun er kostur
- Menntun sem nýtist í starfi er kostur, þó er ekki krafa gerð um að umsækjandi hafi lokið háskólaprófi
- Færni í tölfræði og reynsla af framkvæmd kannana er kostur
Starfshlutfall er breytilegt eða eftir samkomulagi.
Kynningarbréf ásamt ferilskrá og meðmælum skal senda í tölvupósti á netfang ráðsins: shi@hi.is merkt „Atvinnuumsókn“.
Umsóknarfrestur er til og með 1. júní 2026. Umsóknir sem berast eftir þann tíma eru ekki teknar gildar.
Ritstjóri
Ritstjóri hefur yfirumsjón með útgáfu Akademíunnar sem gefin er út í byrjun skólaársins sem og Stúdentablaðsins sem gefið er út fjórum sinnum á skólaári, tvö blöð á hvoru misseri. Nánari tímasetning fer eftir ákvörðun ritstjóra og skrifstofu Stúdentaráðs. Ritstjóri skipar í ritstjórn og stýrir störfum hennar. Hann sér um dreifingu á Stúdentablaðinu og er ábyrgur fyrir því að birta efni úr því á heimasíðu þess.
Ritstjóri aðstoðar við auglýsingasöfnun en framkvæmdastjóri Stúdentaráðs hefur yfirumsjón yfir henni sem og rekstri blaðsins.
Hæfniskröfur:
- Þekking og áhugi á málefnum stúdenta
- Reynsla af fjölmiðla- og útgáfustörfum
- Reynsla af grafískri hönnun er kostur
- Góð almenn tölvukunnátta
- Þekking á vefumsjón er kostur
- Gott vald á íslenskri og enskri tungu
- Frumkvæði og geta til að starfa sjálfstætt
- Vilji til að vinna með Stúdentaráðsliðum, starfsmönnum skrifstofu Stúdentaráðs og öðrum hagsmunaaðilum ráðsins
- Menntun sem nýtist er kostur
Starfshlutfall er breytilegt eða eftir samkomulagi.
Kynningarbréf ásamt ferilskrá og meðmælum skal senda í tölvupósti á netfang ráðsins: shi@hi.is merkt „Atvinnuumsókn“.
Umsóknarfrestur er til og með 1. júní 2026. Umsóknir sem berast eftir þann tíma eru ekki teknar gildar.
Októberfest SHÍ verður haldið hátíðlega 4.-6. september í Vatnsmýrinni
Forsala hefst er hafin, mjög takmarkað miðamagn í boði.
