Studentarad – Page 12

Opið fyrir umsóknir í fyrstu úthlutun Stúdentasjóðs

Posted on October 10, 2022October 11, 2022 by Studentarad

Búið er að opna fyrir umsóknir í fyrstu úthlutun Stúdentasjóðs. Hægt er að sækja um styrki hér til kl. 14:00 þann 24. október nk.. Við hvetjum ykkur eindregið til þess að fara eins ítarlega eftir leiðbeiningum í umsóknarskjali og kostur er, en frávik frá reglum varðar frávísun umsóknar.

Áður en sótt er um hvetjum við ykkur til að kynna ykkur Stúdentasjóð á heimasíðu Stúdentaráðs og sérstaklega lög og verklagsreglur hans. Athugið að greiningarstyrkir og framfærslustyrkir verða ekki veittir í þessari úthlutun.

Spurningum skal vísað til Dagnýjar Þóru Óskarsdóttur, forseta sjóðsins, á netfangið studentasjodur@hi.is.

Yfirlýsing Stúdentaráðs um fjármögnun almenningssamgangna og innleiðingu U-passa fyrir stúdenta

Posted on October 7, 2022October 10, 2022 by Studentarad

Stúdentaráð Háskóla Íslands hefur sent frá sér yfirlýsingu þar sem lýst er yfir áhyggjum af stöðu almenningssamgangna á Íslandi og þess krafist að íslenska ríkið tryggi stóraukið fjármagn í málaflokkinn strax, í rekstur almenningssamgangnanna og í innleiðingu U-passa fyrir stúdenta.

Stúdentaráð gagnrýnir að ríkisstjórnin hafi varið níu sinnum meira fé í niðurgreiðslu rafbílakaupa en til reksturs Strætó bs. Þessi dýrasta loftslagsaðgerð stjórnvalda gagnast helst efnameiri hópum samfélagsins. Efling almenningssamgangna er bæði nauðsynleg og réttlát loftslagsaðgerð sem felur í sér bætt kjör og tækifæri fyrir almenning. Einkum og sér í lagi fyrir tekjulægri hópa, svo sem ungt fólk og stúdenta sem nota almenningssamgöngur í meira mæli en tekjuhærri hópar.

Stúdentaráð kallar eftir aðkomu ríkisins við að verða láta U-passa verða að veruleika, en U-passi er samgöngukort á hagstæðu verði fyrir stúdenta, sem Stúdentaráð hefur lengi talað fyrir og sækir fyrirmynd sína til Evrópu. Slík útfærsla er þegar til skoðunar hjá Háskóla Íslands og hafa viðræður við Strætó átt sér stað. Hins vegar er ljóst er að til þess að U-passinn geti orðið að veruleika þarf pólitískan vilja og fjármagn, bæði frá ríki og sveitarfélögum.

Það verður að vera raunhæfur valkostur fyrir stúdenta að komast á milli staða á skilvirkan hátt, bæði hratt og örugglega án óþarfa kostnaðar fyrir fólk og umhverfi. Ríkisstjórnin þarf að auka fjárframlög til málaflokksins strax, með það að leiðarljósi að bæta þjónustu og gera almenningssamgöngur að hagkvæmari kosti, meðal annars með innleiðingu U-passans. Hér er um að ræða réttláta loftslagsaðgerð sem hefur áhrif í þágu samfélagsins alls.

Yfirlýsingin hefur verið send á fjármálaráðherra og forsætisráðherra og má finna hana í heild sinni á student.is, hér.

Félagsráðgjöf háskólanema opnar

Posted on September 30, 2022 by Studentarad

Nýverið opnaði Félagsráðgjafardeild Háskóla Íslands Félagsráðgjöf háskólanema, sem veita mun háskólanemum og fjölskyldum þeirra ráðgjöf sem m.a. snertir fjölskyldumálefni, uppeldi og samskipti. Markmiðið með Félagsráðgjöf háskólanema er í senn að þjálfa nemendur í starfsréttindanámi í félagsráðgjöf í að veita faglega ráðgjöf og bjóða háskólanemum stuðning í erfiðum málum sem þeir kunna að glíma við.

Selma Björk Hauksdóttir, aðjunkt við Félagsráðgjafardeild, sem hefur umsjón með þessu nýja verkefni hefur unnið að undirbúningi verkefnisins frá því í sumar en áður höfðu stjórnendur Félagsráðgjafardeildar, Stúdentaráð Háskóla Íslands og Kennslusvið skólans lagt drög að hugmyndinni sem varð til þess að styrkur var veittur fyrir tveggja ára tilraunaverkefni.

Þjónustan er gjaldfrjáls og fer fram á Aragötu 9. Stúdentar geta bókað tíma hjá Félagsráðgjöf háskólanema á Uglu og einnig er hægt að senda fyrirspurnir í gegnum netfangið felradgjof@hi.is.

Stúdentaráð fagnar tilkomu Félagsráðgjafar háskólanema og bættum úrræðum fyrir stúdenta.

Vilt þú taka þátt í starfsemi nefnda Stúdentaráðs?

Posted on September 26, 2022 by Studentarad

Nefndir Stúdentaráðs eru í leit að sínum fimmta meðlim til að ganga til liðs við sig. Um er að ræða alþjóðanefnd, félagslífs- og menningarnefnd, jafnréttisnefnd, fjölskyldunefnd, umhverfis- og samgöngunefnd, lagabreytinganefnd og fjármála- og atvinnulífsnefnd.

Í umsókninni skal taka fram stutta kynningu á umsækjanda og fyrri reynslu sem gæti nýst í nefndinni, námsleið og hvers vegna umsækjandi telur sig eiga heima í nefndinni. Umsóknir skulu berast á netfangið shi@hi.is. Umsóknarfrestur er til og með 1. október.

Hér að neðan má sjá yfirlit yfir starfsemi nefndanna:

Félagslífs- og menningarnefnd

Verkefni nefndarinnar eru margvísleg en hún sér um skipulagningu, framkvæmd og utanumhald á hinum ýmsu viðburðum innan Háskóla Íslands, t.d. viðburði í tengslum við Októberfest SHÍ, Fyndnasta háskólanemann og Partybingó. Nefndin leggur mikið upp úr því að gleðja samstúdenta, með góðum móral og samheldni stúdenta HÍ.