Alda María Þórðardóttir, Fannar Gíslason og Sæþór Már Hinriksson hafa verið ráðin inn á réttindaskrifstofu Stúdentaráðs Háskóla Íslands. Ráðið var í stöður framkvæmdastjóra, ritstjóra Stúdentablaðsins og kjara- og réttindafulltrúa, en um er að ræða fjölbreytt og ábyrgðarfull hlutverk sem styðja við daglega starfsemi ráðsins og þjónustu við nemendur.
Framkvæmdastjóri á skrifstofu SHÍ
Alda María Þórðardóttir, 24 ára, tekur við starfi framkvæmdastjóra á skrifstofu Stúdentaráðs Háskóla Íslands. Hún er í BS-námi í hagfræði við Háskóla Íslands og hefur aflað sér reynslu af störfum í opinberri stjórnsýslu, meðal annars hjá launadeild Heilsugæslu höfuðborgarsvæðisins og við bakvinnslu hjá Tryggingum og ráðgjöf. Hún gegndi hlutverki varafulltrúa í Stúdentaráði og sat í sviðsráði félagsvísindasviðs starfsárið 2024–2025 og hafði þar áður setið í stjórn Ökonomíu sem varaformaður á skólaárinu 2023–2024.
Í starfi framkvæmdastjóra felst umsjón með daglegum rekstri skrifstofunnar, fjármálastjórn, bókhaldi og samningsgerð. Einnig tilheyrir starfinu að halda utan um fundargerðir og tryggja markviss og skilvirk samskipti innan ráðsins og við hagsmunaaðila.
Ritstjóri Stúdentablaðsins
Sæþór Már Hinriksson, 25 ára, hefur hafið störf sem ritstjóri Stúdentablaðsins. Hann stundar BS-nám í viðskiptafræði við Háskóla Íslands og lauk áður diplómanámi í viðburðastjórnun frá Háskólanum á Hólum. Hann býr yfir fjölbreyttri reynslu úr fjölmiðlum og ritstjórn, en hann hefur unnið bæði sem ritstjóri og blaðamaður hjá Feyki á Norðurlandi vestra og sem blaðamaður hjá Morgunblaðinu.
Ritstjóri Stúdentablaðsins stýrir ritstjórnarstarfi og mótar efnisstefnu blaðsins, skipuleggur útgáfuáætlanir og sér um auglýsingasöfnun. Hann leiðir ritstjórnarteymið og ber ábyrgð á ritstjórnarlegri úrvinnslu efnis með það að markmiði að efla blaðið sem vettvang fyrir fjölbreytta og gagnrýna umræðu meðal stúdenta.
Kjara- og réttindafulltrúi við skrifstofu SHÍ
Fannar Gíslason, 26 ára, hefur tekið að sér hlutverk kjara- og réttindafulltrúa á skrifstofu Stúdentaráðs Háskóla Íslands. Hann er með BS-próf í rafmagns- og tölvuverkfræði frá Háskóla Íslands. Fannar hefur komið víða við í stúdentastarfi, meðal annars sem varafulltrúi í Stúdentaráði starfsárið 2024–2025 og sem fulltrúi í sviðsráði verkfræði- og náttúruvísindasviðs.
Kjara- og réttindafulltrúi sinnir ráðgjöf og þjónustu við nemendur varðandi kjör og réttindi þeirra á vinnumarkaði. Starfið er liður í samstarfi Stúdentaráðs og Visku – stéttarfélags og felur jafnframt í sér þátttöku í fræðslu og vitundarvakningu um réttindamál, í nánu samstarfi við skrifstofu Visku.
Októberfest SHÍ verður haldið hátíðlega 4.-6. september í Vatnsmýrinni
Forsala hefst er hafin, mjög takmarkað miðamagn í boði.
